NOAA/MMPA စည်းမျဉ်းများနှင့် သတ်မှတ်ချက်များကို လိုက်နာနိုင်ရန်အတွက် ငါးလုပ်ငန်းဦးစီးဌာန၏ ကြိုးပမ်းမှုများ

၁။       ငါးလုပ်ငန်းဦးစီးဌာနအနေဖြင့် အမေရိကန်နိုင်ငံ၊ အမျိုးသားသမုဒ္ဒရာနှင့် လေထုစီမံ ခန့်ခွဲရေးဌာန (NOAA) က ထုတ်ပြန်ထားသော ပင်လယ်နို့တိုက်သတ္တဝါ ကာကွယ်ရေးအက် ဥပဒေ (MMPA)တွင် ဖော်ပြထားသော စည်းမျဉ်းများ၊ သတ်မှတ်ချက်များကို ၂၀၁၈ ခုနှစ်မှ စတင်၍ တက်ကြွစွာဖြင့် အကောင်အထည်ဖော်ဆောင်ရွက်လျက်ရှိနေပါသည်။  ရှားပါးရေနေ သတ္တဝါမျိုးစိတ်များနှင့် ပင်လယ်လိပ်မျိုးစိတ်များ ထိန်းသိမ်းရန်အတွက် (၁-၆-၂၀၁၈) ရက်နေ့တွင် ညွှန်ကြားချက်အမှတ် (၆/၂၀၁၈)ဖြင့် ကမ်းဝေးတရွတ်ဆွဲပိုက်များတွင် လိပ် လွတ်မြောက်ရေးကိရိယာ Turtle Excluder Devices (TEDs) ကိုမဖြစ်မနေတပ်ဆင် အသုံးပြု ရန်ထုတ်ပြန် ညွှန်ကြားခဲ့ပါသည်။အဆိုပါညွှန်ကြားချက်သည် (၂၀၁၉-၂၀၂၀) ခုနှစ် ငါးဖမ်း ရာသီစတင်သော (၁-၉-၂၀၁၉)တွင် စတင်အသက်ဝင်ပြီး ကမ်းဝေးတရွတ်ဆွဲ ငါးဖမ်း ရေယာဉ်များ ငါးဖမ်း မထွက်ခွာမီ စစ်ဆေးရေးအဖွဲ့များထံ (TEDs) တပ်ဆင် ထားခြင်းရှိ/မရှိ စစ်ဆေးမှုခံယူပြီး၊ တပ်ဆင်ထားပြီးမှသာ ပင်လယ်ပြင်သို့ထွက်ခွာခွင့်ပြုခဲ့ပါသည်။ လက်ရှိ အနေဖြင့်လည်း ဌာနဆိုင်ရာများနှင့်ဖွဲ့စည်းထားသော စစ်ဆေးရေးအဖွဲ့များက ပင်လယ်ပြင် သို့မထွက်ခွာမီနှင့် ပင်လယ်ပြင်တွင်လည်း တပ်မတော်(ရေ)၊ မြန်မာနိုင်ငံကမ်းခြေစောင့် တပ်ဖွဲ့နှင့် မြန်မာနိုင်ငံ ရေကြောင်းရဲတပ်ဖွဲ့တို့မှလည်း (TEDs) တပ်ဆင် ထားခြင်းရှိ/မရှိ အချိန်နှင့်တပြေးညီ စစ်ဆေး လျက်ရှိပါသည်။

၂။       ညွှန်ကြားချက်အားမလိုက်နာသော ငါးဖမ်းရေယာဉ်များအနေဖြင့် ၂၀၂၁-၂၀၂၂ ငါးဖမ်း ရာသီတွင် (TEDs)တပ်ဆင်ထားခြင်းမရှိဘဲ ဖမ်းဆီးနေသော ရခိုင်ပြည်နယ်နှင့် တနင်္သာရီ တိုင်းဒေသကြီးမှ ကမ်းဝေးတရွတ်ဆွဲပုစွန်ငါးဖမ်းရေယာဉ်စုစုပေါင်း ( ၈ ) စီးတို့ကိုလည်း ညွှန်ကြားချက်ပါအတိုင်း ဒဏ်ကြေးငွေများ ပေးဆောင်စေခြင်းဖြင့်အရေးယူခဲ့ပါသည်။ ယခင်က သတ်မှတ်ခဲ့သော  (TEDs) တပ်ဆင်ထားခြင်းမရှိဘဲ ငါး/ပုစွန် ဖမ်းဆီးကြောင်း တွေ့ရှိ ရပါက ပထမအကြိမ်အတွက် ဒဏ်ကြေးငွေ ကျပ် (၅) သိန်း အစား ပြစ်ဒဏ်တိုးမြှင့်သည့် အနေဖြင့် ကျပ် (၁၀) သိန်း အထိ ပြင်ဆင်အရေးယူခဲ့ပါသည်။

၃။       ငါးလုပ်ငန်းဦးစီးဌာနသည် ဒေသတွင်းနှင့် နိုင်ငံတကာမှသတ်မှတ်ထားသော လုပ်ထုံး လုပ်နည်းများ၊ စည်းမျဉ်းစည်းကမ်းများနှင့် သတ်မှတ်ချက်များကို အလေးထားဂရုပြု ဆောင် ရွက်ထားသကဲ့သို့ ရေလုပ်သားများနှင့် ရေလုပ်ငန်းရှင်များကိုလည်း ရေနေနို့တိုက်သတ္တဝါ များအားမဖြစ်မနေထိန်းသိမ်းကြရန်နှင့် ငါးလုပ်ငန်းဉီးစီးဌာနမှ ထုတ်ပြန်ထားသော ညွှန်ကြား ချက်များ၊ ဥပဒေများနှင့် စည်းကမ်းများကို လိုက်နာကျင့်သုံးစေရန်အတွက် အထူး တိုက်တွန်း ညွှန်ကြားလျက်ရှိပါသည်။ 

၄။       သို့မှသာ တာဝန်သိငါးဖမ်းခြင်းဆိုင်ရာအလေ့အကျင့်များကို မြှင့်တင်နိုင်ပြီး ရေရှည် တည်တံ့သောရေငန်ငါးလုပ်ငန်းနှင့် ရေနေနို့တိုက်သတ္တဝါများအပါအဝင် ရှားပါးရေနေ သတ္တဝါ များကို ထိန်းသိမ်းစောင့်ရှောက်နိုင်မည်ဖြစ်ပါသည်။

(ငါးလုပ်ငန်းကြီးကြပ်ရေးနှင့်အခွန်ဌာနခွဲ၊ ငါးလုပ်ငန်းဦးစီးဌာန)